Poesia e Modellos

Dominiga su 28 de Maltu 2010 19:08 |

(Treighina retrogada a punt’in mesu)

Nd’iscrien de modellos pagu intotu,

ma cheret apretzada sa bellesa,

in poesia, balet che richesa

e puru ponet, mente e arte in motu.

Fit de mastros su donu, cust’est notu,

chi umpare fin sos astros a cunsonu,

cust’est notu, fit de mastros su donu,

chi a cunsonu, umpare fin sos astros

su donu, cust’est notu, fit de mastros,

chi sos astros, a cunsonu fin umpare,

cun versos e incastros pro cantare

chi como, tropu lassan in disparte.

Ma cheret apretzada sa bellesa,

in poesia, balet che richesa,

in motu puru ponet, mente e arte.

Poesia, ch’in vida tenet parte,

de sentimentu e armonia ’estida,

chi parte tenet, poesia in vida,

bestida ’e sentimentu e armonia,

ch’in vida tenet parte, poesia

de armonia ’estida e sentimentu,

puit’est de su coro s’istrumentu

e s’anima l’impreat dignamente.

Ma cheret apretzada sa bellesa,

in poesia, balet che richesa,

arte, in motu puru ponet e, mente.

Iscrita e fiorida atentamente,

cun serra e pianita est abellida,

atentamente iscrita e fiorida,

abellida est cun serra e pianita,

fiorida atentamente e iscrita,

cun pianita abellida e cun serra,

pro narrer cun amore de sa terra

e de Deus, chi faghet e disponet.

Ma cheret apretzada sa bellesa,

in poesia, balet che richesa,

e mente e arte in motu puru ponet.

Ammentos e memorias proponet

e narat de cuntentos e timorias,

e proponet ammentos e memorias,

de timorias narat e cuntentos,

memorias proponet e ammentos,

de cuntentos e timorias narat,

e fatos e bideas chi cumparat,

pintat in versos de lughe e iscuru.

Ma cheret apretzada sa bellesa,

in poesia, balet che richesa,

e ponet mente e arte in motu puru.

In sardigna est cultura de seguru

puru est antiga e digna sa figura,

de seguru in sardigna est cultura

sa figura est antiga e puru digna

est cultura de seguru in sardigna

est digna sa figura e puru antiga

ch’in su presente ancora b’est s’istiga

chi medas an tocadu e an connotu.

Nd’iscrien de modellos pagu intotu.

Franco Piga

---------------------------------------------------------------------------------------------------------------------------------------------------------

Pesada: (a – b – b1 – a1)

Rotatzione de s’ultimu versu de sa pesada.

(c – d – e – f – a1);(a1 – c – d – e – f );(f – a1 – c – d – e);(e – f – a1 – c – d);(d – e – f – a1 – c)

Rotazione de sas rimas pro ogni istantzia.

(A – B – x); (x – A – B);(B – x – A) / (C – A1 – B1);(B1 – C – A1); (A1 – B1 – C) / (c1- n^x).

< Prec.

Poesia e Modellos

Aggiungi commento